Muzeu Historik Kombëtar organizoi veprimtarinë “Një ditë me kuratorin!” me temë: “Monedhat, dëshmi e zhvillimit të qytetërimit ilir”.

Kjo veprimtari arriti të krijojë një bashkëpunim me shkollat e mesme dhe të larta, duke sjellë më afër objektin muzeor tek studentët.
Në lektoriumin e sotëm u fol mbi shkëmbimin tregtar, i cili kishte një rol të rëndësishëm në jetën e fiseve ilire. Zhvillimi i shpejtë shoqëror dhe ekonomik i shoqërisë ilire, përfaqësohet nga monedhat, të cilat ndryshonin nga materiali, pesha, legjendat, simbolet dhe nga vlerat e tyre. Pjesëmarrja e gjerë në fushën ekonomike nga ilirët vërteton se zhvillimi ekonomik i Ilirisë kishte hyrë në një rrugë të re, ku gjëja e gjallë nuk formonte njësinë ekskluzive të llogaritjes në marrëdhëniet tregtare. Mirëqenia dhe forcimi ekonomik bëri që qendra të rëndësishme ilire si Dyrrahu e Apolonia, të hapin punishte monetare për prerjen e monedhave autonome. Krahas Dyrrahut dhe Apollonisë, hedhin në qarkullim prerjet e tyre edhe qytetet ilire Amantia, Bylis, Olympe, Orik, Skodra etj. Duke ngritur punishte monetare autonome, shtetet dhe qytetet ilire, që mbështeteshin tashmë edhe mbi një bazë të shëndoshë ekonomike, forcuan dhe përmirësuan më tej jo vetëm organizimin e tyre të brendshëm shtetëror, por i siguruan vetes, në këtë mënyrë një pozitë më të pavarur ekonomike e politike.
Qëllimi i leksionit ishte evidentimi i monedhave ilire, vendet e gjetjeve dhe simbolet e përdorura në to. Ato paraqesin anët më të dukshme të jetës së popullit, si aftësinë detare (anija liburne), karakterin luftarak (mburoja dhe përkrenarja), apo bujqësinë e blegtorinë si një nga burimet ekonomike kryesore të vendit (simbolizuar nga dhia, gruri, bleta etj.).

28061711_1845518368844261_3843405311135168066_o 28161983_1845518198844278_4695504205490474197_o 27993114_1845517978844300_2891913610076651553_o 28071003_1845517805510984_3551823659013127985_o

Leave a Comment

Adresa juaj email s’do të bëhet publike. Fushat e domosdoshme janë shënuar me një *

error: Content is protected !!