Skënderbeu nga fëmijët

“Skënderbeu nga fëmijët” është një ekspozitë në pikturë dhe skulpturë kushtuar Heroit tonë Kombëtar Gjergj Kastriot Skënderbeu, organizuar nga Qëndra Kombëtare e Kulturës për Fëmijë në bashkëpunim me Muzeun Historik Kombëtar. Viti Mbarëkombëtar i Gjergj Kastriotit Skënderbeut bëri që fëmijët të mund të realizojnë krijime origjinale siç ata e përceptojnë heroin e tyre të zemrës: simbol i kombit, luftëtarin e pathyeshëm e kalorësin zemërmadh.
Në ceremoninë e hapjes së kësaj ekspozite në fjalën e tij përshëndetëse drejtori i Muzeut Historik Kombëtar, Dr. Dorian Koçi, falenderoi Qëndrën Kombëtare të Kulturës për Fëmijë për këtë bashkëpunim dhe uroi fëmijët pjesëmarrës në ekspozitë për punimet e tyre. Dr. Koçi i ftoi të gjithë fëmijët, që së bashku me prindërit e tyre, të vizitojnë edhe ambientet e muzeut për të marrë sa më shumë informacion dhe për të hyrë në dinamikat dhe në zhvillimet e vetë historisë sonë kombëtare nëpërmjet identifikimit të figurave dhe ngjarjeve tona të rëndësishme historike.
Kjo ekspozitë u kurua nga Sektori i Krijimtarisë Artistike pranë Qëndrës Kombëtare të Kulturës për Fëmijë, nga përgjegjësi i sektorit, z. Fatjon Sulstarova, dhe specialistët Anisa Sala dhe Ilir Kllojka.
Fëmijët e talentuar përmes 80 punimeve të realizuara në teknika të ndryshme në pikturë, skulpturë dhe vizatim në akuarel, plastelinë, laps akrelik, grafika, paraqesin me origjinalitet nëpërmjet botës së ngjyrave dhe materialeve të ndryshme portretin e Skënderbeut si dhe tablo dhe krijime të frymëzuara nga historia e betejave dhe ngjarjeve të rëndësishme të kohës. Fëmijët pjesëmarrës ishin të moshave të ndryshme nga 7-13 vjec. Punimet e kësaj ekspozite janë përzgjedhur si më të mirat të realizuara në rrethin e pikturës dhe skulpturës pranë Qëndrës Kombëtare të Kulturës për Fëmijë.

31531154_1942428599153237_2540816413665263616_o 31485380_1942428532486577_2180240955544698880_o 31935684_1942429219153175_8814522086925008896_o 31907238_1942428962486534_8397659875504553984_n 31944886_1942428875819876_2705168139020140544_o 31919383_1942428779153219_4067877097861808128_n

Leave a Comment

Adresa juaj email s’do të bëhet publike. Fushat e domosdoshme janë shënuar me një *

error: Content is protected !!