“Arkeologu i vogël” vazhdon të gjejë zbatim edhe në ditët e verës. Këtë herë, pjesë e projektit, ishin fëmjët e kampit veror të shkollës jopublike “Faik Konica”, të cilët erdhën në Muzeun Kombëtar për tu angazhuar në projektin e drejtpërdrejtë ku mësohen hapat e parë të punës kërkimore. Të udhëzuar nga specialistet e Muzeut Historik Kombëtar si dhe të mësuesve të tyre, fëmijët gërmuan lehtësisht me lopata të vogla dhe gjetën objektet e fshehura enkas për ta. “Arkeologu i vogël” është një projekt i cili ka si qëllim të bëjë pjesë të gërmimeve arkeologjike fëmijët nga mosha 7-11 vjeç dhe përdorimi i mjeteve arkeologjike dhe teknikave të gërmimit u jep mundësinë nxënësve të jenë arkeologë për një ditë dhe të bëjnë zbulimet e tyre për epokat kryesore historike në Shqipëri. Projekti “Arkeologu i vogël” synon që të afrojë në ambientet e muzeut fëmijët e të gjithë vendit.
